Revelation of John 3
1«ចូរសរសេរទៅទេវតារបស់ក្រុមជំនុំនៅក្រុងសើដេសថាព្រះអង្គដែលមានព្រះវិញ្ញាណទាំងប្រាំពីររបស់ព្រះជាម្ចាស់និងមានផ្កាយទាំងប្រាំពីរមានបន្ទូលដូច្នេះថាយើងស្គាល់ការប្រព្រឹត្ដិរបស់អ្នកហើយអ្នកឈ្មោះថារស់ប៉ុន្ដែអ្នកស្លាប់ទេ។ 2ចូរប្រុងស្មារតីហើយពង្រឹងអ្វីៗនៅសល់ដែលបម្រុងនឹងស្លាប់នោះដ្បិតយើងបានឃើញថាការប្រព្រឹត្ដិរបស់អ្នកមិនបានគ្រប់លក្ខណ៍នៅចំពោះមុខព្រះជាម្ចាស់របស់យើងឡើយ។ 3ដូច្នេះចូរនឹកចាំថាអ្នកបានទទួលនិងបានឮជាយ៉ាងណានោះចូរកាន់តាមហើយប្រែចិត្ដចុះបើអ្នកមិនប្រុងស្មារតីទេនោះយើងនឹងមកឯអ្នកដូចជាចោរហើយអ្នកមិនដឹងថាយើងនឹងមកឯអ្នកនៅពេលណាឡើយ 4ប៉ុន្ដែនៅក្រុងសើដេសក៏មានអ្នកខ្លះក្នុងចំណោមអ្នកមិនបានធ្វើឲ្យសម្លៀកបំពាក់របស់ពួកគេស្មោកគ្រោកទេអ្នកទាំងនោះនឹងដើរជាមួយយើងទាំងស្លៀកពាក់ពណ៌សដ្បិតពួកគេស័ក្ដិសមណាស់។ 5អ្នកណាមានជ័យជម្នះអ្នកនោះនឹងបានស្លៀកពាក់ពណ៌សដូច្នោះដែរយើងនឹងមិនលប់ឈ្មោះរបស់អ្នកនោះចេញពីបញ្ជីជីវិតឡើយយើងនឹងទទួលស្គាល់ឈ្មោះរបស់អ្នកនោះនៅចំពោះមុខព្រះវរបិតារបស់យើងនិងនៅចំពោះមុខពួកទេវតារបស់ព្រះអង្គដែរ។ 6អ្នកណាមានត្រចៀកចូរស្ដាប់សេចក្ដីដែលព្រះវិញ្ញាណមានបន្ទូលមកកាន់ក្រុមជំនុំទាំងនោះចុះ»។ 7«ចូរសរសេរទៅទេវតារបស់ក្រុមជំនុំនៅក្រុងភីឡាដិលភាថាព្រះអង្គដ៏បរិសុទ្ធព្រះអង្គដ៏ពិតព្រះអង្គដែលមានកូនសោរបស់ស្ដេចដាវីឌបើព្រះអង្គបើកគ្មានអ្នកណាបិទបានហើយបើព្រះអង្គបិទក៏គ្មានអ្នកណាបើកបានមានបន្ទូលដូច្នេះថា 8យើងស្គាល់ការប្រព្រឹត្ដិរបស់អ្នកហើយមើល៍យើងបានបើកទ្វារចំហនៅពីមុខអ្នកដែលគ្មានអ្នកណាអាចបិទបានឡើយ។ អ្នកមានកម្លាំងបន្ដិចបន្ដួចមែនប៉ុន្ដែអ្នកបានកាន់តាមពាក្យរបស់យើងព្រមទាំងមិនបានបដិសេធឈ្មោះរបស់យើងឡើយ។ 9មើល៍យើងនឹងធ្វើឲ្យក្រុមជំនុំរបស់អារក្សសាតាំងជាពួកអ្នកដែលហៅខ្លួនឯងថាជាជនជាតិយូដាប៉ុន្ដែមិនមែនឡើយពួកគេជាពួកកុហកគឺយើងនឹងធ្វើឲ្យពួកគេមកក្រាបនៅទៀបជើងរបស់អ្នកហើយពួកគេនឹងដឹងថាយើងស្រលាញ់អ្នកមែន។ 10ដោយព្រោះអ្នកបានកាន់តាមពាក្យរបស់យើងដែលឲ្យស៊ូទ្រាំនោះយើងនឹងរក្សាអ្នកឲ្យរួចផុតពីគ្រានៃសេចក្ដីវេទនាដែលបម្រុងនឹងមកលើពិភពលោកទាំងមូលដើម្បីល្បងលពួកអ្នកដែលរស់នៅលើផែនដី។ 11យើងនឹងមកយ៉ាងឆាប់ចូរកាន់ខ្ជាប់សេចក្ដីដែលអ្នកមានចុះដើម្បីកុំឲ្យអ្នកណាយកមកុដរបស់អ្នកបានឡើយ។ 12អ្នកណាមានជ័យជម្នះយើងនឹងតាំងអ្នកនោះឲ្យធ្វើជាសសរទ្រូងនៅក្នុងព្រះវិហារនៃព្រះរបស់យើងហើយអ្នកនោះនឹងមិនចេញពីព្រះវិហារនេះទៀតឡើយ។ យើងនឹងសរសេរព្រះនាមនៃព្រះរបស់យើងនិងឈ្មោះក្រុងនៃព្រះរបស់យើងនៅលើអ្នកនោះជាក្រុងយេរូសាឡិមថ្មីដែលចុះមកពីស្ថានសួគ៌គឺមកពីព្រះរបស់យើងហើយយើងក៏នឹងសរសេរឈ្មោះថ្មីរបស់យើងនៅលើអ្នកនោះដែរ។ 13អ្នកណាមានត្រចៀកចូរស្ដាប់សេចក្ដីដែលព្រះវិញ្ញាណមានបន្ទូលមកកាន់ក្រុមជំនុំទាំងនោះចុះ»។ 14«ចូរសរសេរទៅទេវតារបស់ក្រុមជំនុំនៅក្រុងឡៅឌីសេថាព្រះអង្គដ៏ជាអាម៉ែនជាសាក្សីដ៏ស្មោះត្រង់និងដ៏ពិតហើយជាដើមកំណើតនៃអ្វីៗដែលព្រះជាម្ចាស់បានបង្កើតមកមានបន្ទូលដូច្នេះថា 15យើងស្គាល់ការប្រព្រឹត្ដិរបស់អ្នកហើយគឺអ្នកត្រជាក់មិនត្រជាក់ក្ដៅមិនក្ដៅយើងចង់ឲ្យអ្នកបើត្រជាក់គឺត្រជាក់បើក្ដៅគឺក្ដៅ។ 16ដោយព្រោះតែអ្នកគ្រាន់តែក្ដៅឧណ្ហៗត្រជាក់មិនត្រជាក់ក្ដៅមិនក្ដៅដូច្នេះនោះយើងនឹងខ្ជាក់អ្នកចេញពីមាត់របស់យើងហើយ 17ដ្បិតអ្នកបាននិយាយថាខ្ញុំជាអ្នកមានខ្ញុំស្ដុកស្ដម្ភហើយខ្ញុំមិនខ្វះអ្វីទេប៉ុន្ដែអ្នកមិនដឹងថាខ្លួនឯងវេទនាគួរឲ្យអាណិតក្រខ្វាក់ហើយនៅអាក្រាតឡើយ។ 18យើងឲ្យយោបល់អ្នកទិញមាសពីយើងជាមាសដែលបន្សុទ្ធដោយភ្លើងដើម្បីឲ្យអ្នកត្រឡប់ជាអ្នកមានហើយទិញសម្លៀកបំពាក់ពណ៌សមកស្លៀកពាក់ដើម្បីកុំឲ្យគេឃើញកេរ្ដិ៍ខ្មាសដែលអ្នកនៅអាក្រាតនោះឡើយព្រមទាំងទិញថ្នាំដាក់ភ្នែកផងដើម្បីឲ្យអ្នកមើលឃើញ។ 19យើងស្ដីបន្ទោសហើយវាយប្រដៅអ្នកណាដែលយើងស្រលាញ់ដូច្នេះចូរមានចិត្ដសង្វាតហើយប្រែចិត្ដចុះ។ 20មើល៍យើងឈរនៅមាត់ទ្វារទាំងគោះបើអ្នកណាឮសំឡេងយើងហើយបើកទ្វារឲ្យនោះយើងនឹងចូលទៅឯអ្នកនោះរួចបរិភោគជាមួយអ្នកនោះហើយអ្នកនោះក៏បរិភោគជាមួយយើងដែរ។ 21អ្នកណាមានជ័យជម្នះយើងនឹងឲ្យអ្នកនោះអង្គុយជាមួយយើងនៅលើបល្ល័ង្ករបស់យើងដូចដែលយើងមានជ័យជម្នះហើយបានអង្គុយជាមួយព្រះវរបិតារបស់យើងនៅលើបល្ល័ង្ករបស់ព្រះអង្គដែរ។ 22អ្នកណាមានត្រចៀកចូរស្ដាប់សេចក្ដីដែលព្រះវិញ្ញាណមានបន្ទូលមកកាន់ក្រុមជំនុំទាំងនោះចុះ»។
Copyright information for
KhmKCB